Dit dail van de toesbladziede is van mie, Paaie Riemaair oet Finnewold. Ik bin op 23-6-1952 oet aai kroopm aan de Klinkerweg op nummer 58. Mit veul plezair heb ik doar tot mien 25ste leevnsjoar woont.
Doarnoa ben ik verhoesd noar Sodem en haar ik 'n onnerkomn aan de Rijnstroate in een boowmwoon op nummer 20.
In de krougn van Winschoot heb ik mien vrau Brenda leren kinnen, Wie gingen doar oet noar Just Fincy, 't Plaintje en Röiel Klub. Toun was zai nog een dun zwart wichie oet Indonesie, geboren op 9-7-1951 in Makassar op Celebes. Op 22 december 1980 het vrau Grezel, amtenoar van de börgerlieke staand van Winschoot, ons traaut. In 1981 binnen wie vervoaren naar Veendam, woonstee van mien vrau sunt 1960.
Noa persies vair joar in Veendam woont te hebben kwam der oetbraiden van 't gezin: Ronald. Hai zag 't licht op 10-4-1984 in 't roomse saikenhoes in stad. Dik twei joar loater op 23-12-1986 in 't sulfde saikenhoes was 't toer aan 't wichie: Mariël.
Om dit volk aalmoal te onderholden was ik tot 2006 doaglieks in de weer bie rieksbelasten in Stad. Ik môs noakieken of de neringdoanden in de previncie heur zoakjes een beetje nuver op regel hebben. Zo nait, joa, din bin ik een minne.
In mien vreie tied en veural noadat ik zaik wordn bin in 2006, bin ik ook doande mit het oetzuiken van mien veuroalders; wat postzegels bie elkoar scharreln en aansichtkoartjes van 't dörp Finnewold en Veendam.
In begun van 2008 heb ik vanweegs mien zaikte ontslag kreegn en bin ik in volksmont een oetkeerntrekker wordn. Wat ie in twei uur doan, doa ik d'heule dag over. Het ken verkeern.
Stroombraifkes ken ie mie sturen mit contactformulier.